vaishaMpAyana uvAcha—
shrutvA dharmAnashEShENa pAvanAni cha sarvashaH |
yudhiShThiraH shAMtanavaM punarEvAbhyabhAShata || 1 ||
yudhiShThiraH uvAcha—
kimEkaM daivataM lOkE kiM vA.apyEkaM parAyaNam |
stuvaMtaH kaM kamarchaMtaH prApnuyurmAnavAH shubham || 2 ||
kO dharmmaH sarva dharmmANAM bhavataH paramO mataH |
kiM japan muchyatE janturjjanmasaMsArabandhanAt || 3 ||
bhIShmaH uvAcha—
jagatprabhuM dEvadEvamanantaM puruShOttamam |
stuvan nAmasahasrENa puruShaH satatOtthitaH || 4 ||
tamEva chArchchayan nityaM bhaktyA puruShamavyayam |
dhyAyan stuvan namasyaMshcha yajamAnastamEva cha || 5 ||
anAdinidhanaM viShNuM sarvalOkamahEshvaram |
lOkAdhyakShaM stuvan nityaM sarvaduHkhAtigO bhavEt || 6 ||
brahmaNyaM sarvadharmmaj~nam lOkAnAM kIrttivarddhanam |
lOkanAthaM mahad bhUtaM sarvabhUtabhavOdbhavam || 7 ||
ESha mE sarvadharmmANAM dharmmO.adhikatamO mataH |
yad bhaktyA puNDarIkAkShaM stavairarcchEnnaraH sadA || 8 ||
paramaM yO mahat tEjaH paramaM yO mahat tapaH |
paramaM yO mahad brahma paramaM yaH parAyaNam || 9 ||
pavitrANAM pavitraM yO maN^galAnAm cha maN^galam |
daivataM dEvatAnAM cha bhUtAnAM yO.avyayaH pitA || 10 ||
yataH sarvANi bhUtAni bhavantyAdiyugAgamE |
yasmiMshcha praLayaM yAnti punarEva yugakShayE || 11 ||
tasya lOkapradhAnasya jagannAthasya bhUpatE |
viShNOrnnAmasahasraM mE shR^Nu pApabhayApaham || 12 ||
yAni nAmAni gouNAni vikhyAtAni mahAtmanaH |
R^ShibhiH parigItAni tAni vakShyAmi bhUtayE || 13 ||
|| OM ||
vishvaM viShNurvaShaTkArO bhUtabhavyabhavatprabhuH |
bhUtakR^d bhUtabhR^d bhAvO bhUtAtmA bhUtabhAvanaH || 14 ||
pUtAtmA paramAtmA cha muktAnAmparamAgatiH |
avyayaH puraShaH sAkShI kShEtraj~nO.akShara Eva cha || 15 ||
yOgO yOgavidAnnEtA pradhAnapuruShEshvaraH |
nArasiMhavapuH shrImAn kEshavaH puruShOttamaH || 16 ||
sarvaH sharvaH shivaH sthANurbhUtAdirnnidhiravyayaH |
sambhavO bhAvanO bharttA prabhavaH prabhurIshvaraH || 17 ||
svayambhUH shambhurAdityaH puShkarAkShO mahAsvanaH |
anAdinidhanO dhAtA vidhAtA dhAturuttamaH || 18 ||
apramEyO hR^ShIkEshaH padmanAbhO.amaraprabhuH |
vishvakarmmA manustvaSTA sthaviShTaH sthavirO dhruvaH || 19 ||
agrAhyaH shAshvataH kR^ShNO lOhitAkShaH pratarddanaH |
prabhUtastrikakuddhAma pavitraM maN^galaM param || 20 ||
IshAnaH prANadaH prANO jyEShThaH shrEShThaH prajApatiH |
hiraNyagarbhO bhUgarbhO mAdhavO madhusUdanaH || 21 ||
IshvarO vikramI dhanvI mEdhAvI vikramaH kramaH |
anuttamO durAdharShaH kR^taj~naH kR^tirAtmavAn || 22 ||
surEshaH sharaNaM sharmma vishvarEtAH prajAbhavaH |
ahaH saMvatsarO vyALaH pratyayaH sarvadarshanaH || 23 ||
ajaH sarvEshvaraH siddhaH siddhiH sarvAdirachyutaH |
vR^ShAkapiramEyAtmA sarvayOgaviniHsR^taH || 24 ||
vasurvasumanAH satyaH samAtmA sammitaH samaH |
amOghaH puNDarIkAShO vR^ShakarmmO vR^ShAkR^tiH || 25 ||
rudrO bahushirA babhrurvishvayOniH shuchishravAH |
amR^taH shAshvatasthANurvarArOhO mahAtapAH || 26 ||
sarvagaH sarvavidbhAnurviShvaksEnO janArddanaH |
vEdO vEdavidavyaN^gO vEdAN^gO vEdavit kaviH || 27 ||
lOkAdhyakShaH surAdhyakShO dharmmAdhyakShaH kR^tAkR^taH |
chaturAtmA chaturvyUhashchaturddamShTrashchaturbhujaH || 28 ||
bhrAjiShNurbhOjanaM bhOktA sahiShNurjjagadAdijaH |
anaghO vijayO jEtA vishvayOniH punarvasuH || 29 ||
upEndrO vAmanaH prAMshuramOghaH shuchirUrjjitaH |
atIndraH saN^grahaH sarggO dhR^tAtmA niyamO yamaH || 30 ||
vEdyO vaidyaH sadAyOgI vIrahA mAdhavO madhuH |
atIndriyO mahAmAyO mahOtsAhO mahAbalaH || 31 ||
mahAbuddhirmmahAvIryyO mahAshaktirmmahAdyutiH |
anirdEshyavapuH shrImAnamEyAtmA mahAdridhR^k || 32 ||
mahEShvAsO mahIbharttA shrInivAsaH satAN^gatiH |
aniruddhaH surAnandO gOvindO gOvidAmpatiH || 33 ||
marIchirddamanO haMsaH suparNNO bhujagOttamaH |
hiraNyanAbhaH sutapAH padmanAbhaH prajApatiH || 34 ||
amR^tyuH sarvadR^k siMhaH sandhAtA sandhimAn sthiraH |
ajO durmmarShaNaH shAstA vishrutAtmA surArihA || 35 ||
gururggurutamO dhAma satyaH satyaparAkramaH |
nimiShO.animiShaH sragvI vAchaspatirudAradhIH || 36 ||
agraNIrggrAmaNIH shrImAn nyAyO nEtA samIraNaH |
sahasramUrddhA vishvAtmA sahasrAkShaH sahasrapAt || 37 ||
AvarttanO nivR^tAtmA saMvR^taH sampramarddanaH |
ahaHsamvarttakO vahniranilO dharaNIdharaH || 38 ||
suprasAdaH prasannAtmA vishvadhR^g vishvabhug vibhuH |
satkarttA satkR^tiH sAdhurjjahnurnnArAyaNO naraH || 39 ||
asaN^khyEyO.apramEyAtmA vishiShTaH shiShTakR^cChuchiH |
siddhArthaH siddhasaN^kalpaH siddhidaH siddhisAdhanaH || 40 ||
vR^ShAhI vR^ShabhO viShNurvR^ShaparvA vR^ShOdaraH |
varddhanO varddhamAnashcha viviktaH shrutisAgaraH || 41 ||
subhujO durddharO vAggmI mahEndrO vasudO vasuH |
naikarUpO bR^hadrUpaH shipiviShTaH prakAshanaH || 42 ||
OjastEjOdyutidharaH prakAshAtmA pratApanaH |
R^ddhaH spaShTAkSharO mantraschandrAMshurbhAskaradyutiH || 43 ||
amR^tAMshUdbhavO bhAnuH shashabinduH surEshvaraH |
auShadhaM jagataHsEtuH satyadharmmaparAkramaH || 44 ||
bhUtabhavyabhavannAthaH pavanaH pAvanO.analaH |
kAmahA kAmakR^t kAntaH kAmaH kAmapradaH prabhuH || 45 ||
yugAdikR^d yugAvarttO naikamAyO mahAshanaH |
adR^shyO vyaktarUpashcha sahasrajidanantajit || 46 ||
iShTO.avishiShTaH shiShTEShTaH shikhaNDI nahuShO vR^ShaH |
krOdhahA krOdhakR^t karttA vishvabAhurmmahIdharaH || 47 ||
achyuthaH prathitaH prANaH prANadO vAsavAnujaH |
apAnnidhiradhiShThAnamapramattaH pratiShThitaH || 48 ||
skandaH skandadharO dhuryyO varadO vAyuvAhanaH |
vAsudEvO bR^hadbhAnurAdidEvaH purandaraH || 49 ||
ashOkastAraNastAraH shUraH shaurirjjanEshvaraH |
anukUlaH shatAvarttaH padmI padmanibhEkShaNaH || 50 ||
padmanAbhO.aravindAkShaH padmagarbhaH sharIrabhR^t |
maharddhirR^ddhO vR^ddhAtmA mahAkShO garuDadhvajaH || 51 ||
atulaH sharabhO bhImaH samayaj~nO havirhariH |
sarvalakShaNalakShaNyO lakShmIvAn samiti~njayaH || 52 ||
vikSharO rOhitO mArggO hEturddAmOdaraH sahaH |
mahIdharO mahAbhAgO vEgavAnamitAshanaH || 53 ||
udbhavaH kShObhaNO dEvaH shrIgarbhaH paramEshvaraH |
karaNaM kAraNaM karttA vikarttA gahanO guhaH || 54 ||
vyavasAyO vyavasthAnaH saMsthAnaH sthAnadO dhruvaH |
pararddhiH paramaspaShTastuShTaH puShTaH shubhEkShaNaH || 55 ||
rAmO virAmO virajO mArggO nEyO nayO.anayaH |
vIraH shaktimatAM shrEShThO dharmmO dharmmaviduttamaH || 56 ||
vaikuNThaH puruShaH prANaH prANadaH praNavaH pR^thuH |
hiraNyagarbhaH shatrughnO vyAptO vAyuradhOkShajaH || 57 ||
R^tuH sudarshanaH kAlaH paramEShThI parigrahaH |
ugraH saMvatsarO dakShO vishrAmO vishvadakShiNaH || 58 ||
vistAraH sthAvarasthANuH pramANaM bIjamavyayam |
artthO.anartthO mahAkOshO mahAbhOgO mahAdhanaH || 59 ||
anirviNNaH sthaviShThO.a bhUrddharmmayUpO mahAmakhaH |
nakShatranEmirnnakShatrI kShamaH kShAmaH samIhanaH || 60 ||
yaj~na ijyO mahEjyashcha kratuH katraM satAN^gatiH |
sarvadarshI vimuktAtmA sarvaj~nO j~nAnamuttamam || 61 ||
suvrataH sumukhaH sUkShmaH sughOShaH sukhadaH suhR^t |
manOharO jitakrOdhO vIrabAhurvidAraNaH || 62 ||
svApanaH svavashO vyApI naikAtmA naikakarmmakR^t |
vatsarO vatsalO vatsI ratnagarbhO dhanEshvaraH || 63 ||
dharmmagub dharmmakR^d dharmmI sadasat kSharamakSharam |
avij~nAtAsahasrAMshurvidhAtA kR^talakShaNaH || 64 ||
gabhastinEmiH satvasthaH siMhO bhUtamahEshvaraH |
AdidEvO mahAdEvO dEvEshO dEvabhR^dguruH || 65 ||
uttarO gOpatirggOptA j~nAnagamyaH purAtanaH
sharIrabhUtabhR^d bhOktA kapIndrO bhUridakShiNaH || 66 ||
sOmapO.amR^tapaH sOmaH purujit purusattamaH |
vinayO jayaH satyasandhO dAshArhaH sAtvatAmpatiH || 67 ||
jIvO vinayitAsAkShI mukundO.amitavikramaH |
ambhOnidhiranantAtmA mahOdadhishayO.antakaH || 68 ||
ajO mahArhaH svAbhAvyO jitAmitraH pramOdanaH |
AnandO nandanO nandaH satyadharmmA trivikramaH || 69 ||
maharShiH kapilAchAryyaH kR^taj~nO mEdinIpatiH |
tripadastridashAdhyakShO mahAshR^N^gaH kR^tAntakR^t || 70 ||
mahAvarAhO gOvindaH suShENaH kanakAN^gadI |
guhyO gabhIrO gahanO guptashchakragadAdharaH || 71 ||
vEdhAH svAN^gO.ajitaH kR^ShNO dR^DhaHsaN^karShaNO.achutaH |
varuNO vAruNO vR^kShaH puShkarAkShO mahAmanAH || 72 ||
bhagavAn bhagahA.a.anandI varamAlI halAyudhaH |
AdityO jyOtirAdityaH sahiShNurggatisattamaH || 73 ||
sudhanvA khaNDaparashurddAruNO draviNapradaH |
divaspR^k sarvadR^gvyAsO vAchaspatirayOnijaH || 74 ||
trisAmA sAmagaH sAma nirbANaM bhEShajaM bhiShak |
sannyAsakR^cChamaH shAntO niShThA shAntiH parAyaNam || 75 ||
shubhAN^gaH shAntidaH sraShTA kumudaH kuvalEshayaH |
gOhitO gOpatirggOptA vR^ShabhAkShO vR^ShapriyaH || 76 ||
anivarttI nivR^ttAtmA saN^kShEptA kShEmakR^cchivaH |
shrIvatsavakShAH shrIvAsaH shrIpatiH shrImatAmvaraH || 77 ||
shrIdaH shrIshaH shrInivAsaH shrInidhiH shrIvibhAvanaH |
shrIdharaH shrIkaraH shrEyaH shrImAn lOkatrayAshrayaH || 78 ||
svakShaH sva~ngaH shatAnandO nandirjjyOtirggaNEshvaraH |
vijitAtmA vidhEyAtmA satkIrttishChinnasaMshayaH || 79 ||
udIrNNaH sarvatashchakShuranIshaH shAshvatasthiraH |
bhUshayO bhuShaNO bhUtirvishOkaH shOkanAshanaH || 80 ||
archchiShmAnarchchitaH kumbhO vishuddhAtmA vishOdhanaH |
aniruddhO.apratirathaH pradyumnO.amitavikramaH || 81 ||
kAlanEminihA vIraH shauriH shUrajanEshvaraH |
trilOkAtmA trilOkEshaH kEshavaH kEshihA hariH || 82 ||
kAmadEvaH kAmapAlaH kAmI kAntaH kR^tAgamaH |
anirddEshyavapurviShNurvIrO.anantO dhana~njayaH || 83 ||
brahmaNyO brahmakR^d brahmA brahma bhahmavivarddhanaH |
brahmavid brAhmaNO brahmI brahmaj~nO brAhmaNapriyaH || 84 ||
mahAkramO mahAkarmmA mahAtEjA mahOragaH |
mahAkraturmmahAyajvA mahAyaj~nO mahAhaviH || 85 ||
stavyaH stavapriyaH stOtraM stutiH stOtA raNapriyaH |
pUrNNaH pUrayitA puNyaH puNyakIrttiranAmayaH || 86 ||
manOjavastIrtthakarO vasurEtA vasupradaH |
vasupradO vAsudEvO vasurvasumanA haviH || 87 ||
sadgatiH satkR^tiH sattA sadbhUtiH satparAyaNaH |
shUrasEnO yadushrESThaH sannivAsaH suyAmunaH || 88 ||
bhUtAvasO vAsudEvaH sarvAsunilayO.analaH |
darppahA darppadO dR^ptO durddharO.athAparAjitaH || 89 ||
vishvamUrttirmmahAmUrttirddIptamUrttiramUrttimAn |
anEkamUrttiravyaktaH shatamUrttiH shatAnanaH || 90 ||
EkO naikaH savaH kaH kiM yat tat padamanuttamam |
lOkabandhurllOkanAthO mAdhavO bhaktavatsalaH || 91 ||
suvarNNavarNNO hEmAN^gO varAN^gaschandanAN^gadI |
vIrahA viShamaH shUnyO ghR^tAshIrachalaschalaH || 92 ||
amAnI mAnadO mAnyO lOkasvAmI trilOkadhR^k |
sumEdhA mEdhajO dhanyaH satyamEdhA dhrAdharaH || 93 ||
tEjOvR^ShOdyutidharaH sarvashastrabhR^tAmvaraH |
pragrahO nigrahO vyagrO naikashR^N^gO gadAgraja || 94 ||
chaturmmUrttishchaturbAhushchaturvyUhaschaturggatiH |
chaturAtmA chaturbhAvashchaturvEdavidEkapAt || 95 ||
samAvarttO.anivR^ttAtmA durjjayO duratikramaH |
durllabhO durggamO durggO durAvAsO durArihA || 96 ||
shubhAN^gO lOkasAraN^gaH sutantustantuvarddhanaH |
indrakarmmA mahAkarmmA kR^takarmmA kR^tAgamaH || 97 ||
udbhavaH sundaraH sundO ratnanAbhaH sulOchanaH |
arkkO vAjasanaH shR^N^gIjayantaH sarvavijjayI || 98 ||
suvarNNabindurakShObhyaH sarvavAgIshvarEshvaraH |
mahAhradO mahAgarttO mahAbhUtO mahAnidhiH || 99 ||
kumudaH kundaraH kundaH parjjanyaH pAvanO.anilaH |
amR^tAshO.amR^tavapuH sarvaj~naH sarvatOmukhaH || 100 ||
sulabhaH suvrataH siddhaH shatrujichChatrutApanaH |
nyagrOdhOdumbarO.ashvatthashchANUrAndhranisUdanaH || 101 ||
sahasrArchchiH saptajihvaH saptaidhAH saptavAhanaH |
amUrttiranaghO.achintyO bhayakR^d bhayanAshanaH || 102 ||
aNurbR^hat kR^shaH sthUlO guNabhR^nnirgguNO mahAn |
adhR^taH svadhR^taH svAsyaH prAgvaMshO vaMshavarddhanaH || 103 ||
bhArabhR^t kathitO yOgI yOgIshaH sarvakAmadaH |
AshramaH shramaNaH kShAmaH suparNNO vAyuvAhanaH || 104 ||
dhanurddharO dhanurvEdO danDO damayitA damaH |
aparAjitaH sarvasahO niyantA niyamO yamaH || 105 ||
satvavAn sAtvikaH satyaH satvadharmmaparAyaNaH |
abhiprAyaH priyArhO.arhapriyakR^t prItivarddhanaH || 106 ||
vihAyasagatirjjyOtiH suruchirhutabhugvibhuH |
ravirvirOchanaH sUryyaH savitA ravilOchanaH || 107 ||
anantO hutabhugbhOktA sukhadO naikajO.agrajaH |
anirviNNaH sadAmarShI lOkAdhiShThAnamadbhutaH || 108 ||
sanAt sanAtanatamaH kapilaH kapirapyayaH |
svastidaH svastikR^t svasti svastibhug svastidakShiNaH || 109 ||
araudraH kuNDalI chakrI vikramyUrjjitashAsanaH |
shabdAtigaH shabdasahaH shishiraH sharvarIkaraH || 110 ||
akrUraH pEshalO dakShO dakShiNaH kShamiNAMvaraH |
vidvattamO vItabhayaH puNyashravaNakIrttanaH || 111 ||
uttAraNO duShkR^tihA puNyO duHsvapnanAshanaH |
vIrahA rakShaNaH santO jIvanaH paryyavasthitaH || 112 ||
anantarUpO.anantashrIrjjitamanyurbhayApahaH |
chaturashrO gabhIrAtmA vidishO vyAdishO dishaH || 113 ||
anAdirbhUrbhuvOlakShmIH suvIrO ruchirAN^gadaH |
jananO janajanmAdirbhImO bhImaparAkramaH || 114 ||
AdhAranilayO dhAtA puShpahAsaH prajAgaraH |
UrdhvagaH satpathAchAraH prANadaH praNavaH paNaH || 115 ||
pramANaM prANanilayaH prANabhR^t prANajIvanaH |
tatvaM tatvavidEkAtmA janmamR^tyujarAtigaH || 116 ||
bhUrbhuvaHsvastarustAraH savitA prapitAmahaH |
yaj~nO yaj~napatiryyajyA yaj~nAN^gO yaj~navAhanaH || 117 ||
yaj~nabhR^d yaj~nakR^d yaj~nI yaj~nabhug yaj~nasAdhanaH |
yaj~nAntakR^d yaj~naguhyamannamannAda Eva cha || 118 ||
AtmayOniH svaya~njAtO vaikhAnaH sAmagAyanaH |
dEvakInandanaH sraShTA kShitIshaH pApanAshanaH || 119 ||
shaN^khabhR^nnandakI chakrI shArN^gadhanvA gadAdharaH |
rathAN^gapANirakShObhyaH sarvapraharaNAyudhaH || 120 ||
|| sarvapraharaNAyudhOM nama iti ||
itIdaM kIrttinIyasya kEshavasya mahAtmanaH |
nAmnAM sahasraM divyAnAmashEShENa prakIrttitam || 121 ||
ya idaM shR^NuyAnnityaM yashchApi parikIrttayEt |
nAshubhaM prApnuyAt ki~nchit sO.amutrEha cha mAnavaH || 122 ||
vEdAntagO brAhmaNaH syAt kShatriyO vijayI bhavEt |
vaishyO dhanasamR^ddhaH syAchChUdraH sukhamavApnuyAt || 123 ||
dharmmArtthI prApnuyAd dharmmamartthArtthI chArtthamApnuyAt |
kAmAnavApunyAt kAmI prajArtthI chA.apnuyAt prajAm || 124 ||
bhaktimAn yaH sadOtthAya shuchistadgatamAnasaH |
sahasraM vAsudEvasya nAmnAmEtat prakIrttayEt || 125 ||
yashaH prApnOti vipulaM yAti prAdhAnyamEva cha |
achalAM shriyamApnOti shrEyaH prApnOtyanuttamam || 126 ||
na bhayaM kvachidApnOti vIryyaM tEjashcha vindati |
bhavatyarOgO dyutimAn balarUpaguNAnvitaH || 127 ||
rOgArttO muchyatE rOgAd baddhO muchyEta bandhanAt |
bhayAnmuchyEta bhItastu muchyEtA.apanna ApadaH || 128 ||
durggANyatitaratyAshu puruShaH puruShOttamam |
stuvan nAmasahasrENa nityaM bhaktisamanvitaH || 129 ||
vAsudEvAshrayO marttyO vAsudEvaparAyaNaH |
sarvapApavishuddhAtmA yAti brahma sanAtanam || 130 ||
na vAsudEvabhaktanAmashubhaM vidyatE kvachit |
janmamR^tyujarAvyAdhibhayaM naivOpajAyatE || 131 ||